நான் எதுவும் சொல்லப் போவதில்லை...! - I

எல்லோராலும் கைவிடப்பட்டதொரு தேசத்தில் 
வாழ்வோமென்ற நம்பிக்கையையும், 
வாழ்ந்தோம் என்ற  நினைவுகளையும் கைவிடாமல் 
சிலுவை சுமக்கும் இயேசுவாய்
சுமந்து அலைந்து திரிவது
இறையாண்மை மீறலெனில், 
அதைத் தொடர்வது 
நமது சனநாயகக் கடமையாகிறது. 
                  -------------
காதலர் தினத்தில் 
உன்னிடம் கையளிக்க 
என்னிடம் ஏதொன்றுமில்லை 
காதலைத் தவிர. 
                  -------------
உள்ளே வெளியே ஆட்டத்திற்கு 
நான் தயார் இப்போது. 
அதிகாரம் வலியுறுத்தும் 
கொடும் சனநாயகச் சட்டங்களின் 
சட்டகங்களுக்குள் நின்று 
வசந்தத்தின் இடி முழக்கமென முழங்குவேன். 
அதிகாரத்தின் உறக்கம் கலைக்கும் 
கொடும் கனவென நானிருப்பேன். 
                    ---------------
மனுசன் கும்புடறதுக்கும் சாப்புடறதுக்கும் 
ஆயிரம் கண்டு புடிச்சிருக்கான். 
வயித்துக்கு வழி செய்யுற 
விவசாயத்தைக் காக்குறதுக்கு தான் 
ஒரு மயிரையும் 
கண்டு புடிக்க மாட்டேங்கறான். 
                  ---------------
நான் நல்லவனாகவோ, 
கெட்டவனாகவோ மாறுவது  
என் கையில் ஒன்றுமில்லை. 
எல்லாம் வல்ல மக்கள் நல அரசின் 
கையில் தானிருக்கிறது. 
                 -------------
பறவைகளுக்கும் விலங்குகளுக்கும் 
தப்பியதே மனுசனுக்கு. 
சிங்களப் பேரினவாதத்துக்கு 
தப்பியதே தமிழீழத்துக்கு. 
                ------------
தாஜ்மகால் ஒன்றும் உலக அதிசயமில்லை. 
தாஜ்மகாலை நான் காண நேர்ந்தது தான் 
உலக அதிசயம். 
               -------------
புகை வண்டியில் 
நடந்தே சாக முடிவெடுத்தவர்களை
காப்பாற்ற முடியாது போலிருக்கிறது. 
             -------------
புகைவண்டி நிலையத்தில் 
இருக்கைகள் அமர்ந்துகொண்டும்
மனிதர்கள் நின்று கொண்டும் 
புகை வண்டிக்காகக் காத்திருக்கிறார்கள். 
              -----------
பழுதடைந்த தள்ளுவண்டியில் 
பழுதில்லாமல் ஓடுகிறது வாழ்க்கை. 
              ----------
கையில் காசில்லாமல் 
காய்ந்து நிற்கையில் தான் 
கோவில் திருவிழா 
களை கட்டும் போலிருக்கிறது.
                ----------
நாட்டுக்காகவும், 
நாட்டு மக்களுக்காகவும், 
தங்கள் இன்னுயிரை கொடுப்பேன் என்று 
சூளுரைத்து அதிகாரத்தைக் கைப்பற்றியவர்கள்   
தமிழக மீனவர் படுகொலை, 
தமிழீழப் படுகொலை, 
மூன்று தமிழருக்கு தூக்கு, 
முல்லை பெரியாறு, 
தண்டகாரன்யப் படுகொலை என்று 
எங்கள் உயிரை எடுக்கத் தானே 
திட்டமிடுகிறார்கள்? 

Tweet